沖繩5天南國之旅2010--Day4(已成定局)

Day 4

2010年4月4日(星期日)

今早心情特別忐忑不安, 皆因來到旅程的第4天, 也是觀鯨的最後機會, 拉開窗簾往外看, 只見地面是濕的, 細看下正落著綿密的雨, 而天色是這幾天以來最差的, 看來出海觀鯨都是無望了

食早餐都要揸揸兜, 進餐廳前服務生會派個貝殼比你, 示意把它放在進餐的桌上, 用途很明顯, 走時記得把它歸還喔~

 

去魚市場時途經3A百貨, 見時間尚早就入去打咗個白鴿轉, 睇中咗件T都叫做有收獲, 離開時雨勢轉大, 對出海觀鯨已打定了輸數, 一切都已成定局, 所以當OTS職員Lisa姐來電再不用安排延期, 最後幫忙通知番香港快運退回觀鯨費用

到達泊いゆまち魚市場, 落車時勁大雨, 剛好可以進去避一避, 可能落雨關係場內都比較冷清, 逛了一圈後發覺這裡的海鮮種類並不多, 連最普遍的扇貝, 魚販都話不能用來做Sashimi, 真叫人感到沮喪同失望

 

 

在市場內最最吸引的可能就是這檔1000日元3組的刺生, 當然是一分錢一分貨那種, 抵食與否就真係見人見志啦~

 

 

在別檔買了海螺刺生、甜蝦、還有魚販伯伯親手現切的三文魚刺生, 味道一般, 沒有驚喜

 

 

這幾天都是局限於室內景點遊覽, 陽光海灘似是跟我無緣, 更別說是染紅了晚霞和蛋黃般紅的落日; 無得觀鯨, 唯有shopping, 剛才往魚市場途中見到有個大型購物中心, 決定回程時逛一逛, 中心內有大型電器店、服飾店、超市、餐廳、日用雜貨等...

 

行行吓見到呢間壽司店D壽司賣相好吸引, 一於入去試吓, 一試之下唔止個樣得, D食材仲得, 又鮮又甜, 呢餐食得好滿足, 讚~

廻轉壽司6碟合共¥2,560/HK$223

喺魚市場入面見得最多就係剥咗皮...死相各異的雞泡魚

黃昏時份就來到那霸市內最旺的一條街～國際通, 國際通是沖繩最具代表性的街道, 全長1.6公里, 街道兩旁都是餐廳、酒吧、百貨店、工藝禮品店等, 吃的、逛的、買的可說是在一條街內就能滿足哂你所有願望, 而停車場更沿街都是, 雖然收費比較貴, 但對揸車人士來說非常方便, 事關梗有一個喺左近

 

位於國際通附近的第一牧志公設市場, 其實是座街市大樓, 共分兩層, 樓下是售賣蔬菜、海鮮、土產食品、肉類至小吃等, 有見過的、有未見過的、琳琳種種都有...; 樓上是品嚐沖繩料理的熟食中心, 可在樓下選購食材後, 交由樓上的食店代為烹調, 店家只收取每人3盤500日元的烹調費

大多數人都會幫襯的長嶺鮮魚, 揀好咗食材後就會幫你拎上樓上的～御食事處ツバㄨ烹調, 店家有台灣員工坐鎮, 所以溝通無難道, 揀好位子坐定定等食就得啦~

御食事處ツバㄨ食堂連台灣人氣旅遊節目～世界正美麗的主持人～鴨子也來過, 而早前在無線播出的戀戀沖繩旅遊特輯, 其中一集官恩娜都有在這介紹吃的, 仲發覺原來跟她同枱添~

來到沖繩當然要試吓這裡特有的～夜光貝, 一般size都比較大, 而我地在魚檔就揀了隻細size的、仲要咗珊瑚蚌和2隻海蝦; 不用說夜光貝和珊瑚蚌咁新鮮當然以Sashimi方式處理啦, 而海蝦就BBQ; 夜光貝肉質爽脆, 但近邊位置就非常硬, 最欣賞都是珊瑚蚌, 好味到丫...早知買多兩隻, 而海蝦太大隻啦~ 蒜蓉開邊焗會好D

今餐無理價錢, 所以唔記得幾錢

用完餐後就是手信時間, 唔理好醜, 最梗要就手, 樣樣都買D, 搞到一袋二袋, 又落著大雨, 又唔記得攞遮, 景況都幾狼狽; 諗住喺雪糕店食雪糕避避雨, 點知掛住食唔記得影相, 雨勢看來只會越落越大, 只好就地買把cheap cheap遮擋住先, 返到酒店遮都爛埋

貝殼造型的夜燈好靚, 好想買, 可惜兩腳插唔啱香港用

大路手信都係嗰幾味, 雪塩餅、黑糖、沖繩限定、星砂飾物等...星砂其實是有殼海洋生物有孔蟲的軀殼, 死後其軀殼被海浪沖到海灘上經風化而成一粒粒芝麻般大的星形沙粒

 

上一篇：Day3-Part 2

下一篇：Day 5 (餘波未了)

 

泊いゆまち魚市場

Tel：098-868-1096

地址：沖繩縣那霸市港1-1

網址：http://www.odnsym.com/spot/tomariyui.html

國際通

地址：沖繩縣那霸市久荗里至安里

網址：http://www.kokusaidori.net/

第一牧志公設市場

Tel：098-867-6560

地址：沖繩縣那霸市松尾2-10-1

網址：http://www.odnsym.com/spot/kousetu.html

御食事處ツバㄨ

電話：098-867-8696

地址：沖繩縣那霸市松尾2-10-1第一牧志公設市場1樓