台中4天南投美景之旅2010--Day1(快運小風波)

Day 1

5月19日(星期三)

 快運小風波

 

經上次沖繩一役後, 話過以後唔再選乘香港快運, 點知今次台中之旅, 都係逃唔過乘搭快運的命運, 唉~~

今早會搭UO162於1205開出的航班, 有過上次的經驗, 我地就直接到Terminal 2, 一於食完早餐才過去辦手續, 點知咁都出事...

見到櫃位無人排隊仲以為執到寶, 估唔到今次佢地D辦事能力咁鬼快, 不用問又無得揀位兼要分開坐; 距離登機時間只剩30分鐘, 梁生仲要去買鏡頭清潔筆, 因為食早餐時才發覺部機鏡頭污糟咗, 買支筆都用咗20分鐘, 之後仲話要去抽支煙, 搞到時間越來越緊迫, 行去閘口途中遇上快運個地勤催促, 要我地用跑的過去, 上到機見到個空姐攞住張紙由機尾一路行過來, 上面仲大大隻字寫住我地個名, 真係樣衰到爆, 咁既環境梗係快快趣揾位坐低啦, 見到其中一個座位隔離坐咗隻鬼, 仲唔叫梁生坐過去咩~ 有前科真係見到鬼都怕黑

位於Terminal 2的快餐店~ 小食迷城, 食物普普通通, 勝在人少不用等

 

我地個早餐~ 腿蛋治烘底+油脾, 凍熱檸茶各1都係HK$58, 價錢合理

 

飛台中只需個半鐘時間, 話咁快1335就到咗清泉崗機場, 終於可以暫時脫離快運既魔掌; 因為個package包接送服務, 所以一出境就見到個靚仔哥哥拎住大大個名牌等我地, 當初以為是乘普通旅遊巴, 估唔到係部靚靚房車, 個靚仔司機仲斯文有禮, 少說話又專業, 全程不用乘客取行李

急急腳跟住靚仔哥哥行, 既然唔記得換台幣, 部車行咗一段路才醒起, 要折回機場添~

~~~~~~~~~~~~~~~~~~~~

上一篇：東瀛全包宴

下一篇：山上城堡