沖繩5天南國之旅2010--Day1(波折重重)

Day 1

2010年4月1日(星期四)

波折重重

未出發回程航班時間都改了兩次, 原先回程時間是16:20, 第2次通知改為19:35, 第3次落實時間是18:00, 真是比少女的心還要多變...

由於香港快運沒有網上預辦登機服務, 所以今朝10點不到已抵達機場, 一心諗住早點辦妥手續就施施然去食早餐, 怎料位於二號客運大樓的櫃位, 遠遠已見排了長長人龍, 一問之下原來所有快運出發的航班都是排那條"龍", 仲話如果排到航班夠鐘出發, 就會有地勤人員叫你...

呆等成個幾鐘, 等到胃都痛, 終於輪到我們了, 但只剩得機尾兩個位, 因為假期人多既關係咁話喎~~

 

辦完行李寄倉手續後即告知11:40要到一號客運大樓閘口預備登機, 望吓個錶只剩不到30分鐘的時間走回一號客運大樓兼食早餐, 匆匆忙忙的跟梁生在皇府share一個麵同豆漿充饑

 

魚蛋麵一碗$40+豆漿一杯$20, Total HK$60大元

臨上機前梁生都仲話要去抽根煙, 差點搞到要成車人等我地兩個咁樣衰, 因為仲要搭一程接駁車去停機坪才正式上機

好多blog友都話快運個飛機餐好難食, 其實都唔係咁差, 不過份量就真係少得可憐喇~~

話咁快3個小時左右就抵達沖繩那霸空港, 從機倉往外望, 映入眼簾的不是普通的客機, 而是航空和海上自衛隊的軍機

過關後走沒多遠就見到租車公司(OTS)的員工舉住個牌等客, 我地當然是其中之一啦, 上前報到後, 梁生見未齊人即爭取時間, 拋妻棄喼於不顧, 只為一己私慾(抽煙)去, 那刻真係有少少嬲鬼咗佢~~

齊人後就由OTS職員帶領乘接送車到位於空港站的營業所辦理取車手續, 等等等...又呆等咗成個鐘, 聽梁生講是先處理網上預約的客人(都有4,5個家庭)才輪到我地, 咁當然啦~ 收錢緊要嘛~

終於可以去車場取車, 卻發現他們弄錯了單據, 差點給別人揸走我地架車;  聽職員講因為細車沒有中文導航, 所以就免費upgarde咗架紅色本田Insight比我地

但係梁生唔鍾意揸大車, 所以要求換番細車, 嗰職員覺得好奇怪, 而且多次提及細車無中文導航, 講真丫~ 係日本租咁多次都是第一次聽到有中文導航, 所以我地話日文GPS都沒問題, 佢就換咗架橙色萬事得2比我地; 點知行咗15分鐘, 個導航就出現問題, 上橋位之後一大段路都沒了顯示, 咁既情況當然要折返, 好彩回程時個導航又回復正常

經過一輪解釋, 又國語、又英語, 職員又親身測試了一圈, 仲話部車是全新未有人揸過應該沒問題, 但最後都幫我地換咗架灰色本田Fit  

搞到成6點鐘先可以正式出發, 本來諗住時間早的話還可以為明天觀鯨到碼頭的路線視察一番, 現在只好直接到酒店check-in, 放下行李後就去美浜美國村醫肚, 由於二次世界大戰期間曾被美軍直接管轄既關係, 現時仍有不少美軍駐守, 而且鄰近美軍基地及家屬聚居處, 所以美國風比較重, 這裡設有大型商場、電影院、電玩中心、保齡球場、沙灘、休閒區和美式餐館, 巨型摩天輪亦是美國村的地標 

在網上有blog友介紹過這間位於美國村的回轉壽司店又平又好食, 初頭會被壽司的賣相吸引, 但食落就一點鮮味都無, 同在香港一般壽司店食沒分別, 所以食咗幾件就走人

費用¥1,400/HK$122

找到間"追風丸"食拉麵, 叫咗碗鹽味拉麵同餃子, 初頭幾啖都好好味, 但跟住就越食越咸, 今餐都係麻麻地

¥1,650/HK$144

位於宜野湾市的全日空ホテルズ　ラグナガーデンホテル

(Laguna Garden Hotel)

介紹沖繩的旅遊書唔多, 係書局只找到呢3本, 我就帶咗右手邊2本闖沖繩

溫馨提示

在OTS租車的話, 記得問職員取這本Guidebook, 好彩得梁生一問, 呢本小冊子好有用架, 入面有齊景點、店舖同食肆的Mapcode, GPS用Mapcode輸入比用電話號碼準得多

上一篇：快運一條龍

下一篇：有驚無險

美浜美國村

地址：沖繩縣北谷町美浜15-69

Tel: 098-926-0222

網址：http://www.shindians.jp/american_village/index.html

 

イオン北谷店

地址：沖繩縣北谷町美浜8-3

Tel: 098-982-7575 ／ MapCode: 33526242*34

網址：http://www.aeon-ryukyu.jp/store/aeon/chatan/

 

全日空ホテルズ　ラグナガーデンホテル (Laguna Garden Hotel)

地址：沖縄県宜野湾市真志喜4-1-1

Tel: 098-897-2121 ／ MapCode: 33403173

網址：http://www.laguna-garden.jp/